現場直擊！香港阿迷親赴布達佩斯睇決賽

【Now Sports】一位追捧阿仙奴20年，自稱「由中學生變中佬」的香港球迷，親赴布達佩斯為愛隊打氣，和大家分享這趟球迷奇遇記。

居住芬蘭的香港插畫師胡鬚（Wusoul），表示此行原來出於偶然：「本來只係想睇機票去旅行，發覺布達佩斯機票價錢唔貴，所以原本只係逗留6日，之後喺threads先知，歐聯決賽喺布達佩斯舉行，重要係同一個星期（當時歐聯仲係8強階段），就諗不如試吓去歐聯官網抽飛，又好好彩抽中咗（當時係4強，仲未落實邊隊入決賽），於是即刻改機票，逗留多3日搵埋住宿。所以嚟布達佩斯之前，係完全冇諗過會睇到歐聯決賽，更加冇諗過阿仙奴入到決賽，當時心諗：如果馬德里體育會入決賽，我仲睇唔睇好？」

胡鬚是透過歐聯官方購買門票：「大約3月初透過網上申請抽飛，4月中知知抽中，最多買兩張，cat2正價一張大約6000港元。」

「我上星期六早上出發，本身居住赫爾斯基，由芬蘭過嚟機程大約兩小時，都算好近。」談到目前布達佩斯的氣氛，他說：「都幾熱烈，一出機場就見到歐聯決賽嘅宣傳，當然街上面電車站、巴士廣告版都有，加埋匈牙利人本身超喜歡足球，今次決賽就係以佢哋足球之神普斯卡斯命名嘅 Puskas Arena舉行，愈臨近決賽，街上愈嚟愈多人著波衫。如果你著波衫出街，就預咗要Small talk啦！」

歐聯官方嘉年華Champions League Final Festival，地點位於布達佩斯市中心的Heroes' Square，且聽胡鬚介紹：「主舞台有DJ派對，入面有唔同嘅足球遊戲攤位，遊戲完成就有獎品，我都拎咗幾包足球卡同一個環保袋。廣場入口附近有小型足球比賽、巨型吹氣歐聯獎盃同埋決賽足球，展示所有歐聯球隊嘅簽名球衣，仲可以同決賽兩隊嘅背景版合照。當然，唔少得啤酒同小食同埋紀念品店，最難得，係可以同歐聯獎盃合照！」

他表示暫未見到來自香港的球迷：「希望明日決賽會見到同聲同氣嘅香港人！一齊為愛隊打氣！」那麼碰到巴黎聖日耳門球迷嗎？「 阿仙奴球迷比較多，比例大約係八比二，都有PSG球迷，大家都會互相望一眼，無乜特別。」

被問到旅程至今暫時最難忘是甚麼時，胡鬚說：「暫時最難忘係參觀博物館『恐怖之家』以及船遊多瑙河，『恐怖之家』講述匈牙利俾納粹德軍同蘇聯佔領嘅黑暗歷史，感受到和平、人本主義嘅重要。黃昏時間船遊多瑙河，感慨呢片土地嘅戰爭同埋被佔領嘅歷史，係今生見過其中一個最難忘夕陽。 」

身為阿仙奴忠粉，他道盡愛隊贏波有利及不利條件：「角球同死球，攻勢始終係今季一大殺著，加上22年嚟再奪英超冠軍，士氣高漲；不利條件，就係『生波運動戰啞火』，如果冇空位嘅話，會陷入膠著。」身為插畫師的他表示，會在決賽睇波畫圖畫，最後，他估計愛隊可小勝2:1封王。

歐聯決賽 巴黎聖日耳門 對 阿仙奴
Now TV 638台 31/05 00:00直播

小高安基：留住阿迪達是首要「廠」務

12小時前

阿仙奴陣前迎喜訊 添巴及時復操

14小時前

【歐戰之巔戰略篇】阿仙奴高位壓逼死球煞食

16小時前

【歐戰之巔戰略篇】PSG側擊凌厲位置互補

18小時前

遭PSG狂迷噓瞞稅 拿斯尼拒親臨歐聯決賽

23小時前