住加球迷：加拿大會記住2026年6月18日！

【Now Sports】細個由香港過嚟多倫多讀書嗰陣，已經係球迷。（當然唔係資深嗰隻啦），記得有次同同學仔一齊去球場睇加拿大友誼賽。嗰個年代，加拿大真係足球沙漠。身邊親戚朋友知道我嘥錢買飛睇足球，個個都笑：「做咩唔去睇 Ice Hockey？」我認真同佢哋講：「加拿大將來有機會打入世界盃。」
撰文：Patrick

仲講過：「或者有一日，我哋會主辦世界盃。」結果俾佢嘲笑我啦，佢哋話：「發夢呀？加拿大足球冇可能啦？」

畢竟嗰陣，國家隊好多球員都係業餘或者半職業。冇人相信加拿大足球會有今日。

但足球最神奇嘅地方係夢想，一步一步踢出嚟。由冇職業聯賽，到 2007 年 Toronto FC 加入美職聯 MLS 大家庭；之後擁有自己嘅加拿大超級足球聯賽 CPL。

由世界排名長期唔起眼，到重返世界盃舞台。由外圍賽永遠差一步，到終於殺入決賽周。

我仲記得上屆卡塔爾世界盃。雖然 0 分出局，但當加拿大射入重返世界盃後第一球嗰一刻……我同朋友開香檳慶祝。

因為等咗太耐，真係太耐。

依家加拿大，包括我，都會記住呢一日。2026年6月18日。

加拿大終於贏得世界盃歷史上第一場勝仗。我喺 Sports Bar 同一大班朋友一齊食 Pizza、Chicken Wings 睇直播。

完場一刻，全場尖叫。

而我，激動到攬住身邊朋友一齊尖叫。因為我哋知道，呢一日，等咗幾十年。

由以前著加拿大波衫俾人笑：「加拿大足球有人睇㗎？」到今日通街都係紅白波衫。
人人都講：「Let's go Canada……」

嗰一刻我發現，堅持會夢想成真。

今日我哋終於可以大大聲講，加拿大唔止係冬季運動強國、冰球王國、唔止有 NBA 總冠軍！

我哋嘅足球，都開始喺世界舞台發光發亮。

撰文：Patrick

洪明甫：至少要和南非

2小時前

C朗家姐讚好鬧般奴文章

4小時前

耶堅：文森比須更重戰術

5小時前

方栢翹：史上最吸金世界盃

5小時前

【世盃‧攻防】美國大軍壓境 VS 澳洲唯快不破

5小時前